立場新聞 Stand News

Where is the blood?

2017/5/9 — 17:02

4月30日下午,荃灣捐血站外現人龍。

4月30日下午,荃灣捐血站外現人龍。

【文:胡人傑@前線科技人員】

睇吓張香港嘅人口年齡分佈圖,我真係唔知點解啲人諗住靠學生捐血可以頂得住樓上班老人家,乜嘢學制都死啦,點解將焦點放喺年青人身上? 年青捐血者日漸減少根本係 expected,應該早有準備,而唔係講到啲學生係問題焦點咁。

(US Census - Hong Kong Population Pyramid)

(US Census - Hong Kong Population Pyramid)

廣告

圖表資料

廣告

不如現實啲,紅十字會係咪要研究下點樣提升系統效率,同吸收多啲中年捐血者呢? 中心嘅開放時間仲係咪適合今時今日7x24嘅打工仔呢?可唔可以用網上預約、手機提示改善人流峰值問題呢?起碼現時一個現象就係平時中心冷清清,但一見吹雞就爆煲:

面對峰值問題,增加設施應付未必係辦法,因為血液存儲期有限,高峰期收集所得用唔切就要報銷,無助補充低峰期嘅不足,所以就係一個系統效率、而唔係系統容量嘅問題。即係,淨係加捐血中心冇用過喎,要善用今日科技去協調人流、整年均勻去捐血中心先得㗎,依家得個咁嘅懷舊網站,網上預約呢類協調功能就冇㗎啦,睇住捐血紀錄頂住先啦。

除咗系統效率問題,亦可以考慮:

(1)縮減下次捐血時限 - 男性以前係3個月,近年縮到75日,但其實美加都係56日,據研究一般人一個月鬆啲已經回復紅血球數量。呢個唔一定係叫人每年捐足6 次,只係增加個人時間調動靈活性,唔駛因為得閒但又俾時限阻住,等夠時限又輪到唔得閒,失諸交臂。

(2)廢除對男同志終身不能捐血限制 - 世界醫學進步,對 AIDS 日漸了解,所以近年都已經對 LGBT 捐血者有所開放,唯獨香港同台灣落後,仍然停留喺80年代思維。

 

(紅十字會年報 2016, P.47)

(紅十字會年報 2016, P.47)

圖表資料

根據紅十字會年報,香港捐血者約17萬,佔人口3%唔到,捐血者年齡分佈顯示,人口最重飛嘅51~60歲捐得最少(60歲以上就由佢啦),其實大把空間可以開拓,中年唔捐得咁密咪靠人多囉,中年組別健康人數比例相對青年低,咁咪靠提高健康中年嘅捐血意識囉。

留意16-20歲組別係一個5年區間,其他皆為10年,原因相信係16歲為最低捐血年齡,唔可能整個11-20歲組別出嚟,並無他意(唔好咁多陰謀論)。同其他年齡組別比較上,16-20歲嘅13.3%一啲都唔低,其實係同21-30歲組別差不多咁踴躍,雖然就算13.3%都跑贏人口近乎佢4倍嘅51-60歲組別…

唔好學埋晒689啲口號治港,實實在在研究問題,好過同人網上鬥嘴啦,就算鬥嘴都要直接、全面解答,一路就係講啲唔講啲,俾人 chok 吓又講多啲,冇陰謀都搞到好似有陰謀咁啦。其實紅會到依家都未答晒啲問題㗎,人哋 challenge 你有幾多非本地人用咗本地血丫嘛,點解你唔順便講埋非本地人嘅入院次數呢類咁嘅數據呢,我印象中係幾個 % 咁細微,唔好又要等人 chok 你先講啦。

《立場新聞》記者上週日在荃灣捐血站發現,市民需要等候1個多小時才能捐血。

《立場新聞》記者上週日在荃灣捐血站發現,市民需要等候1個多小時才能捐血。

仲有,醫管局五百萬年薪啲高層去晒邊?點解要我呢啲街坊做埋你嗰份?你哋淨係識出糧㗎?點解你哋自己睇唔到問題?點解唔搞個宣傳自己捐血、鼓勵中年人捐血?

係,我都係中年人,我都好耐冇捐血,呢兩日去囉,不過捐血中心如果開放到 10pm 就 very good 喇,我每日搞東搞西搞到 9pm 先去食飯,你哋 7pm 就收檔真係好麻煩。

當然,年青人熱心公益捐血係好事,我亦希望你哋依據健康狀況繼續良好習慣,只不過數據顯示,年青人已經克盡己責,依家係輪到中年朋友,尤其係60後挺身而出。自己香港自己救,今次唔好推晒落年青人身上啦。

發表意見