立場新聞 Stand News

作為曼聯球迷

2017/5/12 — 19:15

曼聯昨晚驚險晉級歐霸盃決賽。(圖片來源:曼聯fb)

曼聯昨晚驚險晉級歐霸盃決賽。(圖片來源:曼聯fb)

一個香港球迷,同曼徹斯特市無任何關係,無在當地生活過,亦唔識當地人,無乜嘢地區感情可言,點解當曼聯闖進歐霸盃決賽時,會開心到跳起呢?

唔知幾多曼聯粉絲有思考過呢個問題:究竟果種紅魔鬼的身分認同感從何而來,又基於乜嘢?當然,感情嘅嘢唔一定有得解釋,但和任何感情一樣,始終係可以問到篤,藉此了解下有無一些不會來去如風(所謂有穩定性)的根據:

曼聯贏波關妳/你乜事?點解佢砌低切爾達(證明佢唔係西維爾2.0),妳/你仲high過自己落(街)場踢個波入網,或high過自己打機稱霸?果種覺得自己是曼聯一部分的唔止歸屬感咁簡單。以前曼聯是大賽的台柱,做勝利球迷叨下光,分享無上光榮,是正路的解釋。但時移勢易,而家爭的只是次一級的獎盃(當然,冠軍有份踢歐聯是開心嘅),贏咗唔太威,輸左更無面,仲對佢不離不棄,除了說明妳/你對佢的感情係經得起考驗外,仲代表乜?

廣告

曼聯唔係一個有血有肉的生命,妳/你對佢好,佢會對番妳/你好。佢最有代表性的領軍人物,好似費爵爺呀、碧咸呀已不在其位,曼聯的足球哲學/風格亦隨著教練的不同而有變,那麼,所謂捧曼聯,其實在捧甚麼?會徽?班主?贊助商?或者是一種自我的投射,像某些宗教的經驗?我當然無一勞永逸的答案。

Baldwin Wong老師早前在Facebook介紹過英美哲學界的大師David Papineau 一本講體育的新書:Knowing the Score,我沒看過,但他的介紹頗有趣:

廣告

「Fan 是什麼?為什麼有些球隊打到垃圾一樣我們仍覺得支持這球隊有價值?如何解釋球迷眼中的價值?Desire theory、objective good teleology 還是deontology?」

我即時聯想到一個哲學問題:體育大國致力於打破世界紀錄,有些紀錄相差的可能只有零點零一秒,究竟這樣子破紀錄,(對人類的)意義何在?有甚麼值得狂喜?

這類問題還有很多,有機會再談。

 

後話:思考這些體育的哲學問題,至少有兩重意義:(一)舉一反三,可以更加了解自己,減低枉過一生的機會;(二)香港要推動和發展足球(或體育活動),不能不首先搞清楚球迷的心態和心理機制,因為,那是球迷熱情的源頭。欠缺熱情,興建幾多個大型場館都無用。

 

#人生 #哲學 #哲學的變革有需要和有可能嗎 #哲學有甚麼用

原刊於作者 facebook

發表意見