立場新聞 Stand News

你估灣仔運動場淨係做運動咁簡單

2017/1/20 — 17:39

灣仔運動場,圖片來源:維基百科

灣仔運動場,圖片來源:維基百科

【文:羅迅】

拔萃仔同喇沙仔,好多時都係私底下嘅好朋友;不過同好多男人一樣,為左自己母校,擺下姿勢總係必然嘅事;所以facebook入面甚少會見到兩邊同聲同氣 – 直到前日。689一話將灣仔運動場拆左起個新嘅會展,成個學界都即刻嘩一聲出嚟,少有地一齊出聲反對。

廣告

灣仔運動場得天獨厚嘅地方,在於佢夠方便,又係個商業區同個海中間,唔會嘈到人。搬到去香港大球場?我肯定唔使半日就有隔離嘅居民投訴女校嘅尖叫同男校嘅怒吼,遑論一大班學生記者老師舊生一定會塞爆掃桿埔。搬到去將軍澳或者小西灣運動場,就猶如要將阿仙奴搬去史丹福橋球場一樣九唔搭八,而且場地設計有問題,不利運動員發揮正常水平。至於啟德?更加唔好講,隨時都會比人攞去增加房屋土地供應。

但呢啲都唔係最重要嘅原因。

廣告

灣仔運動場,係我地嘅集體回憶嚟。

好多好似姚潔貞咁嘅傑出運動員,都講過話呢個係一眾香港田徑運動員圓夢嘅地方,其實,又何止係選手?

每間學界參與學校嘅學生,都總會記得呢到嘅聲音同氣味。

每年三月,灣仔運動場例必嘈到拆天。呢度會成為一眾D1中學田徑場上決勝負嘅地方。打氣聲、尖叫聲、歌聲、歡呼聲,此起彼落。你一句不假外求,我一句best of the best。你出到打大鼓助威,我地有落手落腳整嘅對聯橫額。無他,聲勢大一啲,你嘅同學亦會跑得更快、更高、更遠。學校嘅榮譽,並非只由幾個精英跑手擔當;每個人都有係一份子,每個人都會為冠軍出盡全力。聽師兄講,以前鬥得最勁嘅時候,甚至會係比賽後繼續嗌交,由運動場打到去碼頭,一路過海一路互片,去到尖沙咀碼頭先會講byebye分頭搭巴士走。打氣唔係愛港力個種例行公事,越晏你只會見到越多人;走得堂落得堂嘅同學會毫不猶疑地嚟幫手,放左工嘅舊生會即刻趕過嚟。你會嗌到聲沙然後食喉糖補補然後再嗌到失聲,但你知道咁樣係值得嘅。

灣仔運動場唔大,過左三點之後看台一定唔夠位,因為一早已經比我地塞滿;呢度大風個陣可以好凍,但看台上面個個都係cheer到流晒汗;呢度冇一級運動場嘅螢幕同聲響,但體驗比你睇世界盃直播更加刺激。

呢度係好多代學界學生最熱血嘅記憶嘅場景。

喺看台上面,你會為友校選手收窄同你朋友嘅距離而覺得肉緊;你會因為自己學校嘅選手甩棒而嚇到個心離一離;你會為自己學校輸比友校而沮喪;但你亦會為朋友破紀錄而欣喜、為同學喺最後一刻爆seed超前對手嘅奇跡而欣喜若狂。每一幕唔只係青春,亦係日後做人信念嘅基礎。

落後,唔緊要,繼續追;榮譽,唔係個人嘅事,而係整個群體嘅事;君子相爭,爭完,一樣係老友。

呢啲野,根本唔可以量化,然後同一個新嘅會展比 – 佢地重要好多、太多。會展,起喺邊度分別都唔大;灣仔運動場,只有一個。

我唔係好明,上一代成日話以前點好點好,乜野人情味舊野冇咗好可惜;但調轉頭,就係度將我地想要保留嘅回憶拆晒。灣仔運動場嘅未來係個象徵,佢象徵住香港對未來嘅想像 –我地可以選擇短視咁將建構自己嘅記憶同精神通通拆走,去開路比一啲有短期效益而冇內涵嘅野;又或者放過我地嘅共有回憶,令我地得以用佢嚟傳承我地嘅價值。面對假嘅“發展需求”,我地已經失去得太多,灣仔運動場,係奇蹟註定要發生嘅地方。

守住灣仔運動場,唔要新會展。


--------------------
反對強拆灣仔運動場改劃會展用途聯署傳送門

發表意見