立場新聞 Stand News

克羅地亞絕對可以抬起頭離開俄羅斯

2018/7/16 — 15:21

圖片來源:FIFA World Cup Facebook

圖片來源:FIFA World Cup Facebook

望住克羅地亞班球員全場搏哂老命咁跑去追去哨,我腦入面即刻諗起《踢出我天地》葉恭介嗰句:

「殺到嚟呢度仲點可以停!?」

殺到嚟決賽,無論先前有幾攰、踢過幾多場 120 分鐘,今場唔搏盡仲等啲乜?就算落後 4:1,你都見佢哋盡走落去,搏得一次得一次,總之邊隊放棄先就係輸。

廣告

但係,要追平真係唔容易。盡力,真係盡哂力了。4:2,有輸冇運,有輸個人能力,亦有輸做得唔好,但去到呢個地步,由無人睇好佢哋,到人人欣賞佢哋,克羅地亞係冇嘢輸到。

完場之後,克羅地亞球員即場做咗兩件令人欣賞嘅事。第一,佢哋手牽手先向前來支持嘅球迷致謝;第二,成團圍埋一齊聽教練達歷嘅說話,然後手疊手一齊嗌咗聲,嗰一刻,其實成班球員都好傷好痛,蘇巴錫、摩迪、沙維積高等人更加係喊哂咁口,但佢哋成班人選擇團結渡過呢種傷痛,唔會留低任何一個人獨自傷心。

廣告

做到咁樣,你仲點可以唔欣賞呢一支球隊??

恭喜法國奪冠,但同樣值得畀掌聲呢隊克羅地亞,你哋絕對可以抬起頭離開俄羅斯!

 

標題為編輯所擬,原刊於作者 Facebook

發表意見