立場新聞 Stand News

克羅地亞 — 默默用行動證明自己

2018/7/12 — 13:47

圖片來源:FIFA World Cup Facebook

圖片來源:FIFA World Cup Facebook

望住克羅地亞首次晉身世界盃決賽真係好感動。

由最初要踢附加賽先打入決賽周;去到分組賽偏偏抽中死亡之組,但又估唔到畀佢哋首名晉級;一直畀人睇死頂盡去到八強,但最後一直撐到四強;今場開波前全世界都丁緊英格蘭應該入硬決賽,克羅地亞只係默默用行動為自己證明實力。

由落後到追和再反勝,克羅地亞成場 120 分鐘都係處於主動出擊,唔好唔記得十六強同八強佢哋都打足 120 分鐘,連同今場已經係第 3 場,但佢哋依然下下同你前場搶迫、段段同你哨,有段時間幾乎撳到英格蘭自己都慌。

廣告

今場波,克羅地亞同英格蘭最大分別,並唔係體力或者技術高低,而係嗰種爭勝心,每一下幾咁唔錫身去到盡。摩迪跑到腳軟都繼續哨落去、文素基治傷住都繼續頂硬上,隊友畀波你走位,全隊係齊上齊落,但你睇下英格蘭領先之後做過邊一腳似樣攻勢?華舒福有波先肯走,其他時間都喺度等波,卡尼前場孤軍作戰,成隊波好似唔連一條線咁,同克羅地亞嗰種團結齊攻齊守真係好唔同。唯一要讚就真係龍門碧福特,唔係佢多次神救,英格蘭早已完蛋了。

當人人都睇死你輸硬,但你最後唔止冇輸,仲為自己證明實力,克羅地亞嘅可貴就係,佢哋 11 個人真係出盡奶力去贏到呢個決賽席位返嚟,而過程係贏得相當有說服力。唔可以話係英格蘭輕敵,但被睇低一線嘅克羅地亞真係打得好過對方,呢點相信有睇波嘅人都會認同。

廣告

人人都話法國可以笑住踢,但你望到今場死唔斷氣嘅克羅地亞,仲會唔會咁坐定笠六,輕鬆奪冠?完全冇諗過克羅地亞可以去到呢一步,真係每一場都贏得不易,咁快講結果真係言之尚早,但真係已經收貨,喺好多球迷心目中,佢哋已經贏咗。

今屆世界盃決賽,法國鬥克羅地亞 —

BTW,終於可以見摩迪休息了。

 

標題為編輯所擬,原刊於作者 Facebook

發表意見