立場新聞 Stand News

孫興慜 — 從失意之人到可靠之人

2019/2/3 — 18:55

孫興慜(圖片來源:孫興慜 Facebook)

孫興慜(圖片來源:孫興慜 Facebook)

仲記得第一季加盟熱刺嘅孫興慜,表現不堪入目。全季上陣 40 場(一半時間係後備上陣),僅僅攻入 8 球,只有 4 球係來自英超。

嗰陣嘅孫興慜?只係一個畀人睇唔起嘅亞洲仔。

球會踢唔上正選,國家隊又敗走奧運,佢自己都踢到懷疑人生,一度傳出希望離開僅加盟一季嘅熱刺。不過領隊普捷天奴說服咗佢留低,因為佢話之後嗰季一定有更多機會,亦相信佢表現一定更好。

廣告

你表現唔好,但腦細都仲信任你,唔知係咪因為呢種心態,加上適應咗一年嘅英超節奏,第二季嘅 Son 好快就有出色表現。9 月份 5 賽比賽攻入 5 入球,當中有 4 場拎咗 MOTM,成為首位亞洲人奪每月英超最佳球員。

呢一季孫興慜各項賽事 47 場攻入 21 球(英超 34 場入 14 球),同哈利卡尼、迪利亞里一樣攻入 20+;及後嗰季,孫興慜 Keep 住好表現,各項賽事 53 場攻入 18 球(英超:34 場 12 球),連續兩季都攻入雙位數入波,而一刻,孫興慜已經徹底成為熱刺前場嘅核心成員。

廣告

今季,更加可以話係孫興慜咁耐以嚟最成熟最可靠嘅一季。踏入 12 月中至今,近 10 場為熱刺比賽入面,佢攻入 9 球 5 助攻,今周更憑佢嘅入波絕殺紐卡素,暫時壓過曼城升上英超次席,個人連續兩場贏得 MOTM。

唔好唔記得,呢段日子佢有兩個星期飛咗去踢亞洲盃。13 號嗰日對曼聯正選打足 90 分鐘;三日後佢就飛到阿聯酋,代表韓國踢咗 89 分鐘;接下來嗰幾場都係踢足全場,其中對巴林更加踢足 120 分鐘;出局三日之後即刻返嚟踢英超快車,對屈福特踢足 90 分鐘,然後抖一日又再踢多 90 分鐘對紐卡素。

我只係打出嚟都已經覺得好攰,何況佢係真係落場踢足?難怪上場對屈福特嗰陣尾段已經抽緊筋,真係唔怪得佢。賽後普捷天奴都好唔好意思咁講:「為咗成績,我迫不得已要佢踢全場。」但佢竟然話冇問題啊,攰就攰啲,仲頂到!

一個亞洲人竟然有比歐洲人更強嘅體格、對抗性同耐力,失禮講句,老孫,你真係痴 L 線㗎?

再講,其實呢段日子,卡尼同阿里呢位得分主力接連要抖 2 至 3 個月,球迷自然將希望寄予另一位得力前鋒孫興慜,嗰陣真係所有熱刺球迷希望老孫快啲歸隊。而佢真係不負眾望,喺呢段快車期間唔理自己身體狀況,做出超過 100 分嘅表現,佢完全係用行動話畀球迷聽,冇咗卡尼同阿里唔緊要,仲有佢 —

我諗呢種唔止係叫成熟,仲可以係叫做可靠。

係啊,當你唔掂嘅時候仲有佢喺度撐住,你就會好放心交哂所有嘢畀佢,而佢又可以好盡責咁做到畀你,呢種咪就係可靠囉!

由當日失意之人,到今日成為可靠之人,呢 4 年老孫真係愈嚟愈成熟。踢波如是,做人如是,我都好希望我可以成為別人眼中,一種放心同一種可靠,至少我認為每個男人都應該係要咁。

 

作者 Facebook

發表意見