立場新聞 Stand News

平民球星 — 簡迪

2018/9/18 — 15:40

圖片來源:簡迪 Twitter

圖片來源:簡迪 Twitter

絕對有理由相信,簡迪(N'Golo Kanté)係球壇唯一一位冇 haters,甚至連敵隊球迷都會鍾意佢嘅球星。

是咁的,上週車路士擊敗卡迪夫城,全隊獲得一天假期,簡迪打算坐火車返法國探親,點知 miss 咗班車返唔到。咁啱當時又撞正穆斯林下午禱告,於是信奉穆斯林嘅簡迪就 google 附近有冇清真寺。喺清真寺入面,佢遇到一位阿仙奴球迷 Jalil,傾傾下偈,Jalil 大膽邀約呢位應屆世界盃冠軍成員去佢屋企食餐便飯,而簡迪又真係應承。

難得大球星嚟自己屋企食飯,梗係要招呼周到,大魚大肉,但簡迪話要遵照球會吩咐,只食低蛋白飲食,所以 Jalil 就準備咗咖哩雞一齊食。

廣告

食完飯有咩搞?成班波友梗係即刻打返場 FIFA。雖然就冇透過簡迪用邊隊,但 Jalil 話簡迪贏哂佢哋咁多個人;打完 FIFA,Jalil 再同簡迪一齊睇英超《Match of the Day》,睇返自己對卡迪夫城嘅精華。

睇睇下期間,同場有位利物浦球迷朋友剎有介事咁同簡迪講:「不如你諗下加盟利物浦呀。」平常人聽完都唔知點答你好,但單純過蒸餾水嘅簡迪用最大方而又最萬能嘅說法完場:

廣告

「我考慮下呀。」

飯又食完,機又打咗,偈又傾埋,最後就嚟返張大合照兼單獨合照,簡迪從頭到尾都毫無架子地 say yes,仲全程都展現出招牌嘅燦爛笑容。而短短一句 yes,足以成就 Jalil 同佢一班朋友一個深刻難忘嘅晚上。

"He is such a humble person. Footballers must get annoyed with people asking for photos all of the time, but he was more than happy to take individual photos with us all. He doesn't think he is on another level to you." ─ Jalil

有人話球星成名後就會扮大牌唔識人,但其實大唔大牌係睇你性格同態度,就好似簡迪咁,發咗達都唔忘本,上咗位仍然為人謙卑,踏實又親民,完全唔係似某啲球星搵 PR 夾埋做 show。唔講球技,齋係講呢份平易近人,足以令簡迪成為受萬人敬仰嘅「平民球星」。

 

原刊於作者 Facebook

發表意見