立場新聞 Stand News

廿一次法則

2016/12/14 — 15:43

【文:忻浚賢】

上幾週,同投行飛機王WL第一次練10公里,路線為彩虹啟德碼頭來回。兩條友幾經辛苦穿州過省跑到碼頭公園,上氣唔接下氣,WL突然乩童咁款,我當堂嚇一跳。正當以為佢會大叫「香港九龍新界無得避,要化身玉皇大帝打救蒼生」既時候,點知佢語氣一沉:

「點解我地要咁辛苦跑步先?」

廣告

呢條明明係條難度系數有五粒星既哲學問題。

常言道,「各有前因」,其實係廢話,有邊個一開波會無緣無故跑步先。作為花生社首席研究員,我可以好不負責任地又好肯定咁講:突然間跑步又有恆心保持落去既人,七成七成都係經歷(短期難以接受既)人生大變,例如分手失戀。

廣告

跑步,對於呢七成七人嚟講,係擺脫舊生活模式既起點;講白啲,就係忍受唔到因為挫折所以頹摺廢既自己,要俾自己改變同重新上路既動力。

講就好聽。

一個人經歷大變,都唔代表跑步意志異常堅定。想當初,走入馬乜松同個Sales哥哥講,求其俾對五舊水跑鞋我。原因相當之簡單:跑步都要講風險管理,跑得一次,蝕極都係五舊水。

跑一次步五舊水,缺乏自信,人之常情。尤其根據一個廿幾年無認真做運動既肥佬往績,對上一次跑步,已經係貌似十幾年前既中學體育堂,悲壯下場係跑到嘔,literally跑到嘔,成份完整腿蛋治出返嚟。

一諗起「跑到嘔」,買完對鞋同食完Sam哥既我,已經想立刻放棄。為免洩左道中氣,即刻撥個輪俾印象有跑開步既好友AY補補飛,佢同我講:

「堅持廿一次,就會變成習慣架喇。」

果一刻,我無懷疑AY係咪拋我浪頭,我無諗過點解係廿一而唔係廿二。好傻好天真既我,信以為真,跑足廿一次。

咦,又真係work喎。

其實,啊哥,連續廿一日跑就要三星期,隔幾日跑都要跑幾個月。咁跑法,藥箱都變成手飾箱,加上見到少少修身成果,唔變成習慣至奇。初心者唔信邪,不妨試試。

 

作者簡介:全職以業餘玩法跑步行山,兼職大專誤人子弟,閒時才做政治研究的廢中。

發表意見