立場新聞 Stand News

憶當年那個 24 秒閃電入波的鴨仔

2017/2/2 — 13:04

上年一月,寫過柏圖嘅去留,當時佢仲係以借將身份效力聖保羅。有傳哥連泰斯已接受中甲球隊天津松江(天津權健前身)嘅報價,但柏圖一口拒絕,原因係佢想重返歐洲戰場。後來,佢外借到英超嘅車路士,及後夏天輾轉去到西甲,加盟維拉利爾。

柏圖喺西甲嘅表現,同佢當年喺AC米蘭時期相比,依然有一段距離,但係為球隊於各項賽事上陣23場(6入球2助攻),證明佢喺有立足之地。但最後佢始終要投向天津懷抱,最近以1800萬歐元加盟來季升中超嘅天津權健。

係天津權健鍥而不捨嘅追求?定係維拉利爾嘅不挽留?唔知,人各有志,唔排除有朝一日佢會回流歐洲,反正只係27歲,仲有時間,只係覺得,在於前途方面,依一刻離開主流聯賽,對佢嚟講唔係一個好決定,而且當日矢志重返高峰嘅意志,原來只係得個講字。當然在於錢途方面,或者係難以抗拒,作為旁觀者又豈能怪責佢向錢看?

廣告

當年柏圖17歲登陸意大利AC米蘭,19歲成為絕對主力,一個人撐起鋒線,用速度、用射術去征服米蘭和歐洲。呢隻年少越洋嘅鴨仔曾經喺無數人眼中,「外星人」朗拿度嘅最佳接班人,只可惜傷患拖垮,無以為繼,而佢轉投中超呢個決定,似是告知球迷,呢隻鴨仔早已經唔係當日嗰隻雄心壯志喺歐洲大展拳腳嘅鴨仔。

過去柏圖入過唔少靚波,但記憶中,2011年歐聯分組對陣巴塞時嘅24秒閃電入波(文首片段),係最令人津津樂道;嗰一下轉身、繼而爆速、再送入網,成套動作一氣呵成,係令人深刻難忘。

廣告

唔係成名作,但絕對係代表作,如今亦只能YOUTUBE一再回味。

 

(原文1月31日刊於作者 facebook page

發表意見