立場新聞 Stand News

拿玻里球迷:咸錫你是如此的難以忘記

2019/2/7 — 11:24

咸錫(圖片來源:Marek Hamsik Facebook)

咸錫(圖片來源:Marek Hamsik Facebook)

1. 估唔到咸錫離開咗拿玻里,仲要係超筍價 1,500 萬歐元轉會去咗一個以前冇諗過會登陸嘅聯賽 ─ 中超。

2. 其實每年傳咸錫轉會嘅消息真係多不勝數,唔止意甲對手祖雲達斯、AC 米蘭想買佢,就連 PSG、車路士、巴塞等等歐洲勁旅都想羅致佢,身價亦肯肯定唔止 1,500 萬歐元咁 L 低。不過無論幾錢都好,咸錫總係用最簡單一句說話嚟回應:「我愛拿玻里,我想留喺呢度。」

3. 係呀,咸錫真係好鍾意拿玻里,鍾意到願意喺呢間效力咗 12 年嘅球會掛靴。大佬,佢離掛靴都仲有 6-7 年,就已經想喺度終老,喺呢個商業掛帥嘅年頭講感情,真係球壇少有。講得出呢句嘅人,其實好 L 有型,不過可以更型嘅,就係做得到囉。

廣告

4. 曾經有陰謀論指,以咸錫喺髮型、身型、以至球技方面都咁出色嘅難忍,唔肯走嘅原因唔係唔想走,而係佢嘅家人畀意大利黑手黨買起咗,要脅佢要留喺意大利,唔畀轉會。當然,呢個只係傳聞,從來都冇經證實,純粹深刻有呢段傳聞所以提下。

5. 嗱認真嘅,有人話近年咸錫都想試新挑戰,亦有人話係拿玻里過去收唔到滿意嘅報價而唔放咸錫(我又睇唔出而家個 offer 有幾滿意,至少對球會唔係)。咁咸錫嘅離開,到底係中超嘅熱烈追求?定係拿玻里嘅無情不挽留?

廣告

6. 其實,一個人要走真係需要理由咩?而嗰個理由又真係重要咩?想走嘅人總會搵到原因想走。所以當拿玻里知道咸錫希望有新挑戰,球會係願意同咸錫配合,領隊安察洛提亦表明會成人之美,更拋低一句:「我們願讓他快樂」,真係型 L 到!(我唔理係咪公關說法)

7. 咸錫自己都有講,如果球會堅持唔放人,佢都唔會死纏難打話非走不可。或者,有啲嘢就係大家都想好嚟好去,唔使搞到咁僵,總之 you happy I happy。

8. 不過,拿玻里球迷就點都唔 happy。隊長喎,踢咗 12 年喎、球隊史上入球王兼象徵人物喎,咸錫喺所有拿玻里球迷眼中就係國王,一國豈能沒有王?但係一切已成事實,再唔開心再唔捨得都要接受現實。

9. 要走的都要離開,還是換了另一種方式去愛。正如咸錫所講,喺意大利我只會效力拿玻里一間球會,點都唔會背叛拿玻里而球迷亦會好似前隊長保羅簡拿華路所言,就算佢唔喺呢度,所有人永遠都記得佢。

10. 「有時候有些球員在很多年後被球迷所遺忘,但我相信,咸錫這個名字將永遠被這座城市的大街小巷銘記。」— 保羅簡拿華路

11. It is the end of the story but it is not the end of the love. 留唔得低個心,都至少留低咗一份心意,而唔係負擔啊。

 

作者 Facebook

發表意見