立場新聞 Stand News

教拳一啲都唔容易!

2015/10/7 — 11:45

終於忙完2015香港泰拳冠軍爭奪戰總決賽,呢3個月真係忙到頭都大,心情好波動,再次證明教拳,真係一啲都唔易!

為準備今次賽事,早喺3個月前,我已安排特訓畀4位參賽拳手。除咗一般嘅體能、技術訓練,其實我各自仲要再操佢哋,因為每個人嘅性格、特性、能力、優點同缺點都唔同。

廣告

有啲拳手自信不足、懶散、性格被動,要調教呢啲拳手,需要激將法,可惜我無乜耐性,有時真係畀佢哋反轉頭激到我噴血噴火;不過一本書唔可以讀到老,激將得嚟有時都要循循善誘、好聽啲叫軟硬兼施,俗啲就叫一嗒沙糖一嗒屎,畢竟運動員始終係人,都有情緒同感情,我嘅責任就係唔可以畀佢哋自視過高、亦唔可以自卑,幫拳手調校到去一個平衡點,真係一個好大嘅學問。

廣告

好多人以為我好重拳手嘅成績,實際根本唔係,佢哋有幾多實力我心中有數,我反而著重拳手喺比賽中,可唔可以打出平時練習七或八成水準,因為咁先睇到拳手有冇喺訓練中有得著、有領悟、有消化到我講、我教嘅嘢。

回顧上星期2015香港泰拳冠軍爭奪戰總決賽,榮拳館派出Vicky鄧穎瑜、Nana曾海蘭、Cherie文善彤同Ronald張浩政出戰,結果3名女拳手勝出,Ronald亦只係點數落敗,可是各人表現發揮都總算過得去,我也總算可以來個短假期休息一下!學如逆水行舟,不進則退,希望大家都可以從我今次篇文中有所領悟!

 

原刊於體路

發表意見