立場新聞 Stand News

【李斯特城贏英超】勝者為王 尋回單純的美好

2016/5/5 — 20:15

【文:地球人】

李斯特城奇蹟贏得英超可謂足球史上最大冷門,不論你撐邊隊波憎邊隊波,只要你鍾意足球都不得不為佢哋嘅成功而感動。唔單止係因為果種被一致睇低,最後打破所有成見質疑嘅爽快,更加係因為足球最純真嘅魅力就係不論階級地位嘅公平比賽,勝者為王。呢個童話故事提醒返我哋即使近年呢個運動好似俾金錢利益腐化,佢仍然未變質。只要你有份參加你就有機會贏,冷門熱門都只不過係其他人嘅猜測,開咗波就冇強隊弱旅魚腩之分,只有比數定輸贏。

佢哋熱血嘅奪冠過程相信已經街知巷聞,就算唔睇波都會聽到呢隊上季先勉強護級,開季冠軍賠率有成5000倍,成隊身價加埋都仲平過曼城一個De Bruyne嘅小球會,點樣遇神殺神最後殺出一條血路贏冠軍都不特止,仲要係提前兩輪夠晒招積。

廣告

叫得做奇蹟當然唔係咁易做到,天時地利人和決心毅力運氣缺一不可。

廣告

英超改朝換代?

首先列強今季集體低迷,車路士勇破英超最差衛冕冠軍記錄,曼城季中突然宣佈下季換帥打擊軍心,曼聯太多球員受傷陣容永遠天殘地缺迷失方向,利物浦易帥之後仲未完成磨合表現始終飄忽。(最穩定既始終係阿仙奴......)

唔單止傳統勁旅咁啱同時處於調整期,其他英超老字號都開始跟唔上節奏,好似成季都冇場好波嘅維拉同埋就嚟要攬住降班嘅東北兄弟咁。反觀升班馬屈福特同般利茅夫都有唔錯表現,加上熱刺用英超最年輕嘅隊伍衝擊冠軍,令big4嘅壟斷睇落唔再牢不可破,曾經嘅升降機都想趁機喺英超立足。喺改朝換代嘅氛圍之下,李斯特城成功把握機會劃地為王,更可能係標籤住一個混戰時代嘅開始。

陣容完整top fit

另外主力球員無受傷保持比賽狀態亦係成功關鍵。球員受傷永遠係最難預計又最影響球隊表現嘅因素,對於人腳掹掹緊嘅李斯特城嚟講,每一個主力都係無可替代。結合運氣同適當嘅訓練,佢地成功全季保持fit爆狀態,結果只係用咗英超球隊中最少嘅球員(全季只用過23人同埋最少正選變動)就贏到冠軍。

咁穩定嘅環境之下,球員嘅默契同團隊精神先可以有效建立,形成一個無分你我緊密合作嘅隊伍。

防守反擊出神入化

由上半季嘅大開大合變成下半季嘅魚生粥,中途轉變戰術令佢哋可以捱到漫長賽季。開季連續尾段追平甚至反勝,直到第11場先第一次唔失波,開心到領隊請成隊去食pizza。睇住Mahrez逢人過人Vardy刷新英超連續入波記錄梗係爽快,相信佢哋同球迷都開始忘記佢哋開季嘅任務只係護級,開始有所憧憬。結果喺呢對拍檔大爆發之下,去到12月李斯特城已經係英超入波最多嘅一隊,但係19場亦都失咗25球,只係前面入夠後面輸。

正當支持者都擔心,Haters都睇死佢哋咁任性嘅踢法一定唔可以笑到最後,心諗呢啲虛火嚟架啫嚇我唔到嘅睇你幾時_ _果陣,作為一個縱橫球壇幾十年老謀深算嘅意大利教練,Ranieri又點會諗唔到我哋呢啲普通球迷都諗到嘅嘢呢?

下半季佢仍然堅持反擊戰術,但係焦點就由快速高效嘅反擊移咗去堅固謹慎嘅防守。全隊縮後專注防守,雙閘減少助攻,兩個中場全力攔截,減少防線後嘅空間去隱藏兩個中堅轉身慢嘅弱點,同時用盡佢哋強壯身體加埋可以用橫蠻嚟形容嘅制空力。

出嚟嘅效果相信連領隊都估唔到咁好,防線即時脫胎換骨固若金湯,而反擊依然係咁銳利。結果次循環17場比賽只係失9球,其中11場保持不失包括6場有驚無險嘅1:0勝仗。

正所謂“offense wins games,defense wins championships”,應屆英格蘭足球先生同球員先生嘅入波燃起咗李斯特城爭冠嘅激情,而Morgan同Huth帶領嘅防線仲有Kante同Drinkwater係中場嘅瘋狂搶截就成功守住呢一團火,令佢哋成功捱到最後企上頒獎台。

適時舒緩球員壓力

比起戰術上嘅調整,調整球員心理同期望更困難但係更重要。想像下每場都先失波再係完場前一分鐘先追返,追追下由護級變成爭冠,幻想自己可以捧起冠軍獎盃,壓力自然不斷累積。一班無名小輩同豪門棄將睇住自己隊波爬上第一,踩住當日話佢永遠不會成功嘅母會,應該百般滋味在心頭,更想用冠軍證明自己身價,證明係對方唔識貨。對贏波嘅渴望係球員最基本嘅動力,但係如果因為期望太高而變得怕失敗,反而會令成隊波患得患失裹足不前。

咁重要嘅時刻就更顯出Ranieri嘅經驗同歷練嘅可貴。就算球隊開季成績咁好,佢一直堅持話球隊嘅目標仍然係護級; 競爭越嚟越激烈但係球隊仲係無所畏懼,越嚟越多人開始相信李斯特城有機會捧盃。佢依然同外界講贏英超係不設實際嘅目標,謙虛地講咗一句:

" We want our fans to dream, but we know it's a tough match and from now on there will only be tough matches."
佢哋無被沖昏頭腦,依然繼續檢討每個大小失誤,細心分析接著落嚟嘅每一個搶分嘅機會。而球員亦心無旁騖,專心踢好波就夠,當每一場比賽都係決賽咁踢。

就算領先打少一場嘅熱刺10分,冠軍好似手到拿來,佢都只係瀟灑講左句:

"The fans must continue to dream but we must continue to be concentrated and focused. Now we have two tough matches at home, the Champions League is on the table and we have to keep it. We achieve nothing yet."

佢咁掃興無非係想舒緩球員嘅壓力,怕佢哋俾太美好嘅希望壓垮。

其實喺二月頭作客曼城嘅比賽,連Ranieri都事後承認佢係果一刻真正見到贏英超嘅可能性。遇強越強嘅李斯特城3:1輕取爭冠對手,攞都唔單止係寶貴三分,更加係相信自己可以成為冠軍嘅決心,絕對係心態上嘅轉捩點,等於正式宣布「我哋要爭冠軍!」

之後佢哋已經成為一個無堅不摧嘅團隊,可以話係近年英超最有王者氣質嘅冠軍。

就算佢哋犯錯失波有球員被趕出場,你都可以從每一球五五波每一下反擊睇得出佢哋對贏嘅信念無動搖過。

慶幸自己可以見證到呢個百年一遇嘅熱血故事,更加要多謝李斯特城以身作則提醒我哋要成功最重要唔係技術或者財力,而係決心同肯付出嘅努力決定你可以行到幾遠。

就好似當日第一場clean sheet之後去食pizza,球員去到餐廳先知道雖然係領隊萬歲,但係啲pizza係要佢哋自己整嘅。

 ‘You have to work for everything. You work for your pizza, too. We will make our own.’ 

開心溫馨獎勵球員又講得出大道理,果然係家有一老如有一寶。

呢隊應屆英超冠軍就好似呢餐pizza咁,揉合咗意式嘅智慧同埋英式嘅拼搏,實至名歸!

 

參考資料:

1234567

發表意見