立場新聞 Stand News

傳樂視拎咗英超播映權 我有啲介意

2015/9/8 — 17:14

英超賽事向來是香港球迷的最愛。( 圖為曼聯球星朗尼;圖片來源:英超 facebook page )

英超賽事向來是香港球迷的最愛。( 圖為曼聯球星朗尼;圖片來源:英超 facebook page )

傳聞話LeTV拎咗英超播映權。體育節目,唔想諗得太過政治化了。但有幾樣嘢,我係有啲介意嘅。

呢幾年,間唔中都會撞正有球賽既日子但又身在國內。國內既直播同製作,水平高低見仁見智吧,但風格就肯定唔多合我口味。

老實講我唔太擔心會冇咗廣東話旁述,或者係我樂觀,除非真係有「政治理由」,否則加番個廣東話commentry嘅成本,相對成個項目嘅製作費同轉播費,係九牛一毛,一粒微塵都不如,唔加先至係出奇。不過,會唔會統一咗啲球員譯音之類呢?好耐之前,當我聽到「碧咸」變咗做「貝克漢姆」嗰陣,我堅係覺得頂唔順。

廣告

我喜歡聽何輝講波,佢係少數我覺得講得好既本地講波佬。問心講,本地講波佬既水平如何?除咗個別幾個比較肯做功課既講波佬之外,我覺得有唔少都係hea講居多。除咗因為貴之外,認識有唔少朋友,寧願上網睇波都唔願俾錢收費台既原因,就係因為佢地覺得啲本地commentry唔掂,寧願聽鬼佬講。我都唔係覺得本地講波佬特別好,不過一個禮拜一次既「快樂兩小時」,我都係寧願聽返一個自己熟悉既語言,有番多少本地味道;即使你話我品味低劣我都係咁話。呢個純粹係個人preference。

有人估LeTV拎咗轉播權,會有創新既收費模式令到收費可以降低。當佢個轉播權貴成咁,再加埋需要投入大量硬件投資,縱使佢可能志不在此,但對於「平好多」既推測,我其實好保留。

廣告

發表意見