立場新聞 Stand News

渣馬陀衰渣打的十宗罪

2015/1/17 — 18:46

渣打銀行最近瀕爆負面消息,股價如食瀉藥咁,差不多返回十幾年前的招股價,仲要大規模裁員止血救亡!

如此危急存亡之秋,又要關證券部,又要關分行,但有一項與業務無關的巨額開支竟然冇咳,就係渣打馬拉松的贊助費。

渣馬每年收渣打幾多錢,一直聲稱係「秘密」。雖然贊助費公唔公開,冇話一個準則,好似贊助倫敦馬拉松的Virgin Money,就唔介意係度新聞稿講,五年贊助費約1700萬英鎊(約兩億港幣);贊助波士頓馬拉松的John Hancock公司,雖然無寫總共金額有幾多,但就係度網頁詳細講明邊幾樣野由佢負責,包括:獎金、招募精英跑手參賽的相關開支、運動展覽會、教育計劃等等,條數有得你去計;紐約馬拉松就剛剛換贊助商,由金融機構ING變咗間跨國IT顧問公司TCS,紐馬冇講到贊助幾多,但有講到簽咗八年約。

廣告

透明度冇人嫌高,特別對渣打的股東,佢哋都好應該需要知道,渣打每年究竟塞咗幾多錢去田總荷包。

渣馬盤budget

據未經證實的江湖傳聞,渣打每年的贊助費至少二千萬元。雖然係樓價向二萬蚊一呎邁進的年代,二千萬並唔喺天文數字,但都唔喺話野少,特別係當你計下渣馬個budget,連同73,000 x $300報名費,呢度都已經講緊四千幾萬。再加埋特步、朱古力、BMW、屈臣氏、西隧等等贊助商,渣馬收入有幾多千萬大約估到。(假設路邊社消息無高估)

廣告

咁,渣馬的開支又有幾多?慈母睇場的OT唔駛錢、特步貼錢送埋Tee畀你、Expo維園場租又唔駛錢、水同飲品又有屈臣氏、連蕉都慳得就慳。

作為一個參加過渣馬的跑手,你覺得搞呢壇活動,究竟值幾多錢?相信大家心裡有數。

渣馬十宗罪

高達奔唔喺大右派,唔會反對企業贊助公益,如果渣馬真係好似洪丕正話齋「超越波士頓」,好似世界六大馬拉松咁掂,捐夠二億為香港做件好事都應該!問題係,渣馬喺用緊好多錢贊助一個,年年陀衰自己形象的比賽。

搵錢買石頭砸自己腳,呢樣先至係荒謬。

渣馬衰乜?

  1. 渣馬年年搵不得民心的官員鳴槍,今年仲繼續搵秃鷹鳴槍,令渣馬成為全球噓聲最高分貝的比賽。
  2. 渣馬年年都餵跑手吔生蕉同蕉皮,安排完全喺唔專業。
  3. 難得有熱心市民派食物支持跑手,但竟遭渣馬打壓。渣馬係全世界惟一一個賽會,會做如此低能的行為。
  4. 渣馬的帳目不清、合約私私相授之嫌,一直為輿論詬病,渣打贊助的錢又去咗邊?
  5. 渣馬多年歧視傷殘運動員,這體現在超乎合理的高DQ率,以及輪椅運動員被截停後的待遇,令香港蒙羞。
  6. 渣馬整個比賽安排簡陋,遠遠落後世界同級數城市比賽。除了驚人的清場效率,賽道氣氛與第三世界的鄉間比賽差不多。
  7. 渣馬連一本可以與其他大比賽睇齊的場刊也沒有。所謂的場刊,過去多年一直淪為高官練習書法的園地。
  8. 渣馬由New Balance變成強國的特步,渣打銀行同特步一齊鳴槍,咁喺咪令渣打cheap咗呢?
  9. 渣馬的馬拉松含量其實好低,73,000人裡面,馬拉松其實得個萬幾人。
  10. 渣馬從來冇向葉伯致敬,莫講話冇畀葉伯任何榮譽,渣馬寧願花錢請個所謂最高齡的印度人嚟跑,就都唔願意在葉伯有生之年,酌情送佢上行人路繼續完成賽事。

以上都係「冰凍三尺,非一日之寒」的問題,跑過渣馬的人都知道,鬧都鬧咗好多年。但當一間銀行的CEO可以完全可以唔駛理,佢地喺香港最大、最重要的贊助活動出現的種種問題,一年幾前,佢仲可以大言不慚話渣馬勝過波士頓,其實喺反映咗好多、好多、好多嘢。

果時如果你醒目,就應該放晒渣打銀行的股票。

一齊噓爆秃鷹

最後呼籲各位全馬挑戰組和一組的跑友,起步一刻記住一齊噓爆秃鷹。有關呼籲請參考此FB 群組:召集渣馬跑手,噓爆秃鷹林鄭

發表意見