立場新聞 Stand News

港足的虛火

2015/6/18 — 22:37

港隊連勝兩場?虛火嚟啫。

四年一度的世界杯,賽前訪問市民們支持哪一隊,德國有、英格蘭有、巴西有、阿根廷有,連曼聯都有!偏偏,香港人卻從來沒有支持過香港隊,當然,香港連外圍賽都過唔到。

點解香港人可以支持一隊同自己完全唔同國籍嘅球隊,將幾十個外語翻譯,水蛇春咁長嘅球員記得,仲知道佢地咩位打咩位,係深夜兩點四點較定鬧鐘起身睇波,偏偏自己地方每星期上演的港甲變咗港超都唔知?

好多人會話:屌,咁屎波梗係唔睇啦!

我又問返你,你有冇真係入場睇過先?無,你又點知佢屎唔屎波?

N年前,香港係亞洲區入面嘅強隊,當然,當年無日本嘅戴志偉,亦無韓國球證足球,更無中國少林足球,香港足球有咩?有陳七爆房食煙上C1,有歐冲葡萄牙簽證受阻,有歐偉倫單刀橫傳,有李健和爆底斬中。

無人記得邊個係香港隊領隊,話撐自己人嘅入場人士,連球員名都未知道,佢地效力邊隊都唔知。

幾個星期前,旺角場小貓三四隻,入場班阿叔飲下啤酒,講吓粗口咁就一日,忽然熱情的香港人竟然令門票炒熱全場爆滿。入場的,是真真正正撐香港隊?還是急著上載相片到社交網站?到現場噓噓國歌?給對方無數港式粗口?

先不論背後原因,單單是坐無虛席,已經足夠令球員感受到前所未有的主場之利,所謂主場,要的就是無形的支持,運動拼的,有時就是疲勞之下的臨界點,只要一位球迷叫得出球員的名字,球員便能擠出最後的力量,這就是火。

至於,這是可以燎原的星星之火?還是一陣漂亮耀目的虛火?我不知道,但前車可鑑,一窩蜂是港人的慣例,較早前的冰桶挑戰便是好例子,現在還有誰注意過漸凍人的事?支持小店反對地產霸權運動,多少人能堅持到最後而不故態復萌?

香港人是善忘的,撐你一下,可以,這樣多人一撐之下,港隊衝上雲霄,熱情熄滅後?升得愈高,跌得愈痛。他們被這虛火自燃後,能夠延綿燒下去?還是把自己燒得一乾二淨?

最後一句直線抽擊。

撐,不是臨場撐,台上一分鐘,台下十年功;撐,這個字,並非說的這樣輕鬆。

 

原刊於作者facebook

廣告
廣告

發表意見