立場新聞 Stand News

祖爾巴頓,好波嘅麻煩友

2016/1/20 — 10:46

自認天生異稟嘅祖爾巴頓,當年曾經講過:「你可以話我係惡霸或者其他,但你形容我係正常人,呢個係對我極大侮辱!」

駁唔到.....真係駁唔到。

你駁佢,佢會毫不留情直接屌你;
你唔妥佢,佢會直接打到你唔敢唔妥佢;
你好憎佢,佢會令到你更加憎佢,憎到你唔敢惹佢;
就算你冇做過啲咩,佢唔滿意都可以隔空插爆你,當年泰亞高施華冇啦啦俾佢話踢法似女人,仲串佢係最被高估嘅巴西人,搞到最後要馬賽(唔係純純兔)代佢道歉。

廣告

呢啲咪巴閉囉、英雄主義、疊馬,唔妥你,可以逗你;唔鐘意你,可以泵你;o靚仔你啤咩呀!?出黎隻揪呀!

唔好講笑,佢真做得出,過去真係有o靚仔俾佢打過,連打15拳,打到連牙都甩埋,就連隊友都冇一幸免,曼城隊友達保(Ousmane Dabo)當年俾佢打到變豬頭,眼都睜唔開、曼城更有位年青軍學徒更加比佢用雪茄煙插眼。刑事、非禮、打交、襲擊、傷人、挑釁樣樣試過,連監都坐埋,塵世間仲有咩事佢會驚?

廣告

場外都咁癲,場內點會唔痴線?當年有幾多人試過俾佢從後兇悍攔截。你同佢嘈?你準備定身後事都得啦。食黃牌?打少個?老是常出現吧?比比、迪莊呢啲「殺人王」喺祖爾巴頓面前,都要跪地叫大王。

如果有人問,你知唔知祖爾巴頓以往衰過啲乜?你可以答知,但建議你答「唔知」會好啲,因為佢嘅劣行有如恆河沙數,你要羅列晒出嚟,肯肯定俾答咩叫「洗版」絕對難至少689倍。唔想答完知又答唔出啲乜,不如直接了當答唔知好過啦,至少唔使柒呀嘛。

不過,佢唔痴線時,又的確幾好波嘅,就好似今場為般尼射入一記罰球嘅巴頓,係有啲料到,只係當年因紀律太差搞到事業停滯不前。話說,佢都係英格蘭嘅一帽國腳,07年代表過一場之後,就冇下一場啦。早幾年話退出國家隊俾人笑,但事後一年希望「復出」,話以今時今日佢哋水準,覺得自己比以往有機會入選,暗示英格蘭蜀中無大將。

真性情到咁。

雖然依家偶然都老馬有火,但對比過去算係修心養性咗唔少,只係過往個底太花,花到就算聽到佢個名,都先入為主覺得一定有麻煩事發生。如果佢唔係紀律咁差,可能事業會更上一層樓,不過唔臭脾氣嘅話,呢個就唔係祖爾巴頓啦!

 

原刊於足球說故事

發表意見