立場新聞 Stand News

細路仔學打拳真係唔好?

2015/6/25 — 17:11

成日都有老師和家長同我講,驚細路仔學咗打拳會粗魯、會郁手郁腳,更驚佢哋會喺學校蝦蝦霸霸添!我自己都有兩個細路,佢哋未識行就已經喺拳館玩,識行就開始學打拳,但其實要真係識打拳之前,必須要有一定身體協調能力、平衡力、紀律性同體能等等,而學曉呢堆嘢後孩子嘅個性就會慢慢變得有耐性、有條理、識包容同自律性高咗。

廣告

現今學童有百分之九十嘅時間放喺學業上,身體質素變得冇咁健壯。讀書固然重要,但健康也不能忽視。近年發現好多小朋友,連一些基本運動動作都做唔到,一落堂就嚷著要手機或電腦,情況令人擔心。

廣告

搏擊武術是一項需要高自律同專注嘅運動,當你見到佢哋識得自己戴拳套、紮手帶、收拾拳套、聽指令打沙包,為他人(對手)設想時,其實佢哋已經學識一件了不起嘅事,仲可以令佢哋揮灑多餘精力,練好體魄,畢竟現在學生們功課繁重,測驗又多,學習搏擊未嘗不是一件減壓嘅好活動。

快襯暑假就到,參加一些運動班讓孩子們運動一下筋骨吧!

 

原刊於體路

發表意見