立場新聞 Stand News

英格蘭 — 未能如願,仍算有所交代

2018/7/12 — 13:47

圖片來源:FIFA World Cup Facebook

圖片來源:FIFA World Cup Facebook

雖然噚晚英格蘭整體發揮不及克羅地亞,但都不得不承認,英軍喺死球方面嘅心思同威脅。

今屆英格蘭由分組賽到四強一共入咗 12 球,當中有 9 球係嚟自死球,包括 12 碼、罰球、角球,轉化入球率高達 75%。

每次死球英格蘭都有進攻目標,有時係卡尼、有時係史東斯、有時係麥佳亞。一開始先係一次排開或者圍埋一齊,開出角球時其他球員會作擾敵,真正嘅目標人物衝向空位飛頂,由分組賽對突尼西亞同巴拿馬時,英格蘭已經用角球戰術展示佢哋喺死球方面嘅心思。去到淘汰賽更加成為英格蘭得分本錢。

廣告

先係十六強對哥倫比亞,搏得嗰球十二碼正正就係角球混戰中取得;其後八強面對玩高空攻勢嘅瑞典,英格蘭都可以靠角球先開紀錄;今場面對克羅地亞,英格蘭憑捷比亞嘅靚罰球打開紀錄,其後雖然攻勢唔多,但最有威脅依然係死球。下半場史東斯有下角球飛頂,眼看幾乎入硬,點知最後畀沙維積高護空門。即使尾段死球未能轉化入球,過程驚險到叫人抺一額汗。

死球要做得好,同樣需要訓練千萬次,無論係出波嘅捷比亞、羊格,作掩護嘅卡尼抑或頂波嘅麥佳亞、史東斯,英格蘭都用表現證明佢哋嘅死球戰術係有威脅,唔係負負碌碌撞入。

廣告

雖然踢法唔算最悅目,但至少比以往幾屆嘅英格蘭有一套殺著,先前我已經有文章講過英格蘭團隊喺背後落嘅功夫有幾多。一隊波唔止靠一個人,係幕前幕後都一齊努力營造出嚟。我相信即使英格蘭未能如願走到決賽,今屆有呢個成績都係對球迷有交代。

 

標題為編輯所擬,原刊於作者 Facebook

發表意見