立場新聞 Stand News

萬般皆下品,唯有迪斯高

2015/8/13 — 17:55

1.所謂萬般皆下品,唯有迪斯高。你其實唔使明白點解,只要知道很順口就得了。

2.講起迪斯高,其實我覺得佢同王浩信很似樣,當然講完之後大多人會送上一句:「係呀,大家都有眼耳口鼻!」不過唔少人認為迪斯高更似伊雲斯。

3.如有睇開德甲,應該知道當年迪斯高在禾夫斯堡有幾咁勁。08-09球季,與巴西前鋒格菲迪組成黑白雙剎,二人包辨神射榜頭二位,迪斯高以26球僅次於格菲迪的28球,那季更助狼堡力壓拜仁首奪聯賽冠軍,威水。(其實我仲幾鍾意當年中場核心米斯莫域,而當年同迪斯高拍擋嘅格菲迪已經去咗多哈嘅艾薩德落班)

4.總覺得迪斯高在曼城那四年其實不算十分成功。雖然高價來投,但卻不是領隊首選,不論文仙尼時代,還是柏歷堅尼,永遠都排在阿古路、巴洛迪利及迪維斯之後,但偏偏迪斯高卻不時在幾位前鋒無料到時挺身而出。

5.有人話,曼市雙雄各有一位後備殺手,曼聯的是小豆,曼城的是迪斯高。不少人指踢正選的迪斯高其實無乜料到,反而後備入替就屢見奇功,倒如12-13球季,對陣熱刺71分鐘入替,在完場前大腳抽入贏2:1 ; 對西布朗78分鐘入替入兩球,扭轉敗局,6次後備上陣攻入5球,個刻終於知道咩叫做「萬般皆下品,唯有迪斯高。」但對於迪斯高,佢其實唔甘心只在板凳上等待機會。

6.好聽啲叫後備殺手,難聽啲其實係只有後備落場才有表現的射手。

7.11-12球季,曼城贏得44年來首個聯賽冠軍,阿古路那記絕殺入球最為人津津樂道,反贏QPR一役成為經典,阿古路更成為頭號功臣,但一眾掌聲中卻忽略了同樣在補時階段射入關鍵一球的迪斯高,沒有迪斯高後備入替兼在關鍵時刻頭搥攻入追平一球,或者便沒有之後阿古路的絕殺,這一役也不會成為歷史中的一個經典,話雖如此,卻不能如此計算。

8.由風靡一時嘅鋒霸,到屢見奇功嘅後備殺手,迪斯高的重要性不減,但地位卻是今非昔比。雖然做過球隊首席射手,為曼城入過不少含金量超值的入球,但始終柏歷堅尼的首選是阿古路,迪斯高只不過是工程師的第二甚至第三選擇。卒之,最後,迪斯高離開了曼城,以先借後買的方式轉會到羅馬。

9.雖然在球會打後備,但迪斯高卻是波斯尼亞國家隊的重心人物。2014年首次打入世界盃決賽周,仲好記得當日知道波斯尼亞能夠打入世界盃時迪斯高落下英雄淚的畫面。雖然無法在分組賽突圍,但這次世界盃之旅已成為小國球員的難忘經歷。

10.好多人都講,如果南斯拉夫當年無分裂,或者南斯拉夫應該會擁有好多足球高手,更加成為足球強國。但係你我知道,歷史沒有如果。

 

原刊於足球說故事

廣告
廣告

發表意見