立場新聞 Stand News

跑步 越跑越孤獨

2016/12/7 — 17:18

【文:忻浚賢】

作為專業whatsapp開群組人士,可以寫包單,搞群組團跑,失敗收場居多,或者淪為圍爐吹水區。

無責任推測,大部人平均跑到既range大概係3至5公里。以上述玩法作號召,普遍有唔少人和應:時間相宜,距離適中,輕輕鬆鬆。開頭必定係威係勢,六至七或十幾個人約埋同時起跑,簡直有種「佔領跑道正式啟動」既氣勢同霸氣;慢慢熱潮退去,淨返幾位死硬派成員,諗返起開群組都係多餘。

廣告

有時都唔怪得人。除左地點唔就腳、懶、三分鍾熱度呢類「人力不可違」既潛水理由,人類長久面對最大既生存危機就係OT。即使幾熱愛跑步做運動,面對接近放工時間「腦細之逆襲」,就會發現,to O or not to O,從來都唔係一條question。群組一句「唔好意思,今晚OT」,飛機味字裡行間久久不散,但作為知心跑友,深知「搵食啫犯法啊」既職場法則,往往同情地諒解,再獨自上路斯人獨憔悴。

跑步如修行,一步一腳印;起點縱然相同,但經驗鍛鍊越多,就會想挑戰自己,追求速度,追求更長更遠既路線同玩法。時間一耐,喺各有潛水同修行既情況下,成員間既差別往往係返唔到轉頭:距離門檻越定越高,少則6公里,中則10公里,痴線者更加用半馬做入場費,對於跑步初心者同埋偶爾出席者黎講,真係心諗「做乜啫」;即使俾面出現,起跑初段大家仲可以齊上齊落,但大家體能有異,中後段「我們亦有一些距離」,最後更可以爭幾百個馬位,食完塵影都見唔到。

廣告

久而久之,嚇怕左大部份人,花生友越黎越多,跑友越黎越少。如是者,得出人生大道理一個:跑步始終係個人修行,勉強無幸福,哈哈哈哈哈。

 

作者簡介:全職以業餘玩法跑步行山,兼職大專誤人子弟,閒時才做政治研究的廢中

發表意見