立場新聞 Stand News

韋達,全部都係韋達

2019/6/24 — 13:52

騎師韋達(資料圖片,來源:香港賽馬會)

騎師韋達(資料圖片,來源:香港賽馬會)

韋達 so far 係一個 nice guy,但一講到跑大賽,佢絕對係一個仆街。

無錯,如果你就咁睇維基百科嘅話,你真係以為佢贏過好多大賽,但個實情係,佢喺香港咁多年贏過嘅國際一級賽加埋香港打吡都唔夠 10 場,香港 12 月份嘅傳統 4 項國際一級賽佢都未贏哂。如果拍埋莫雅、戴圖理、蘇銘倫嗰啲真正嘅大賽騎師嚟講,韋達甚至係唯一一位喺職業生涯跌鞭次數多過贏大賽嘅騎師。

簡單嚟講,踏入千禧年之後嘅韋達差唔多次次跑到大賽都會車前倒後,彈出彈入,沿途走位嘅荒謬程度同建制派近月對修訂《逃犯條例》嘅取態絕對有得揮。「靚蝦王」、「精英大師」、「好望角」、「爪皇凌雨」、「蓮華生輝」、「友瑩格」嗰啲揚威國際完全唔關佢事;佢夥拍香港馬王「雄心威龍」遠征杜拜嗰場真係騎到一絕咁差。「大運財」、「美麗大師」、「天才」等等飛起咗韋達之後,戰績都全部更上一層樓。韋達嘅禍港柒事,其實同建制柒事一樣罄竹難書。

廣告

當然,韋達蟬聯過好多屆香港冠軍騎師和最受香港馬迷歡迎嘅騎師,但佢好多時靠嘅只係平時拎到實力超幾班嘅馬嚟策騎,然後「無驚無險,又到終點」,呢一層又同建制派透過蛇齋餅糉籠絡人心同無驚無險自動當選區議員非常相似。不過呢一切都係糖衣毒藥,一去到大賽就現哂形。

正所謂「相信韋達,包冇發達」,喺關鍵嘅時刻,就算你畀最先進嘅美軍裝備佢,佢都同你搞到好似北韓軍演咁,全部射哂落海。各位馬迷,香港嘅前途都嚟到關鍵嘅時刻,你嚟緊真係仲可以對呢班車前倒後嘅建制韋達投下信心嘅一票?

廣告

發表意見