立場新聞 Stand News

飛魚花式舌劍

2016/8/12 — 11:39

【文:徐姿】

水族奧運正進行得「魚伙如荼」,今屆加入新嘅比賽項目「飛魚花式舌劍」。兩大熱門係來自澳洲水域嘅「河遁」同中國水域嘅「鯀佯」,佢哋唔單止游得、飛得,舌劍同樣咁狠勁。

比賽一開始,河遁唔止速度快,更連發多招「騙子」、「禁藥」、「作弊」同「鄙視」攻向鯀佯,鯀佯除咗用「佯儍」同「死撐」勉強頂住之外幾乎毫無還擊之力。其後鯀佯運用中國最強嘅「五毛術」擾亂河遁,然後再以「往績好」、「金牌多」、「強國壓」之類嘅弱招不停咁反攻對手。

廣告

兩條飛魚鬥到非常難睇嘅時候,中國另一條小飛魚「負圓胃」輕輕鬆鬆咁用「天真無邪」、「毫不做作」、「表情豐富」幾招自然流露嘅劍花,將兩條大熱門一口氣徹底擊敗,爆冷贏得「飛魚花式舌劍」項目金牌,實在可喜可賀。

獲得銀牌嘅係速度無與倫比但舌劍一向唔出色嘅美國選手「飛脾鰤」,佢出其不意嘅一招「魚印拔罐」令評判眼前一亮,亦令佢擊敗兩位大熱贏得呢面銀牌。
 

廣告

作者簡介:英國劍橋大學電算系博士。曾任中大電算系及城大創意媒體學院助理教授,後創辦軟件發展公司研發繪圖動畫軟件。近年從事獨立美術創作,2013年獲得美國 New Yorker 雜誌 Eustace Tilley 國際公開美術比賽的兩個獎項。

發表意見