立場新聞 Stand News

得架的士優質有乜用

2016/6/16 — 13:05

電影「的士判官」截圖

電影「的士判官」截圖

政府最近搞「優質的士」志在挽回的士係市民心目中嘅形象,sell 環保概念之餘,又搞免費USB差電,無線上網同電子付費。計小弟話關架車乜事呀,問題所在根本唔係架車快唔快,冷氣爽唔爽,而係個司機已經唔優質,就算換架 limo (編按:Limousine,車身特長的豪華轎車 )俾佢用都係棧趕客。

點解的士司機可以揀客但星斗市民唔可以揀 Uber ? 你有得揀唔過海,過海之前係尖咀放低我,或者交更唔接客,點解我地做客反而無得揀 ? 好啦,揀完過海客又揀還近客,太近你又黑我面,太還你又係唔肯載,到自己揀走曬啲客,又埋怨個市道差、收入低。當然,有人一定好大愛咁話要體諒司機大佬,返左十幾個鐘工坐到生痔瘡都係得雞碎咁多,其實都係受害者,但你有冇諗過坐你的士嘅乘客都係打工仔,返工為逗份糧受氣,點知夜晚OT完放工,俾錢都要受氣。有時真係要學巴士阿叔講 : 「你有壓力,我有壓力,你做乜挑釁我呀?」

的士商會又係不知所謂,居然學埋班「佔中黃屍」咁堵路,仲要大口氣咁話要燒車軚,人地廢青都係為咗等左n年都無嘅真普選先衝出去馬路啫,你年年有錢賺就唔好咁過份啦,應該搞下遊行,或者係 Facebook 整下紅、綠色絲帶先啦。馬雲講得啱,假貨做得比真品還好,大家都係唔好再坐真的士,改坐 Uber 算啦。

廣告
廣告

發表意見