立場新聞 Stand News

Blockchain = 神奇數薄?

2018/1/16 — 19:41

去中心化區塊鍊系統概念圖 l Luke Descryptive(https://descryptive.com/) @ flickr — Attribution 2.0 Generic (CC BY 2.0)

去中心化區塊鍊系統概念圖 l Luke Descryptive(https://descryptive.com/) @ flickr — Attribution 2.0 Generic (CC BY 2.0)

【文:以太郎 Etheron】

好多朋友都話一講到加密貨幣(Cryptocurrency)就聯想起一大堆唔太明嘅名詞,令佢哋對呢個topic卻步。

為左讓大家容易啲上手,我會嘗試下以較貼近生活嘅例子講解下,希望可以令到多啲人明白同認識 Bitcoin/ Ethereum以致Blockchain(更可以搵到賺錢嘅機遇 =P)!今次,我地還原基本步,介紹一下所有加密貨幣既最底層結構--區塊鏈 (Blockchain)。

廣告

Blockchain = 神奇數簿

我地一齊幻想自己係多啦A夢入面嘅大雄,準備要去買豆沙包比多啦A夢,但為左唔好跌左D錢/俾人偷錢,大雄入左$100去佢張“七達通”,準備用嚟俾錢。

廣告

咁傳統既做法,七達通公司會有一本中央帳簿記錄晒每個人戶口入面餘款及交易紀錄。大雄買豆沙包時就要 Do 卡,Do卡呢個動作其實就係通知七達通,去更新佢中央帳簿入面既紀錄。扣你戶口20蚊,加返20蚊去豆沙包店戶口。老闆問一問七達通,聽到回覆係佢自己戶口收到錢,於是就會俾豆沙包大雄。所有人都靠晒七達通本中央數簿去生活。

但當大雄去到豆沙包店,老闆話大雄張七達通入面晒無錢!點會咁呢?

選擇題,原因係:
A. 七達通俾人燒數簿,無晒D帳戶資料
B. 七達通無端端cut左大雄個戶口
C. 胖虎+小福收買七達通,偷走晒大雄D錢

其實......可以係以上所有情況!

可憐嘅大雄只可以跑返去揾多啦A夢求救...

************************

係呢個時候,多啦A夢就攞左件法寶出嚟... -- 神奇數簿(多謝多啦A夢聲演)。

呢本神奇數簿其實同之前七達通個本一樣,有晒所有人既戶口資料及交易。

而神奇嘅地方就係:
1. 呢本神奇數簿唔只有一本,而係千千萬萬本,而佢哋嘅內容係一定一樣嘅。每次有交易,佢仲會自動update每一本數簿。
2. 神奇數簿嘅內容係公開嘅,任何人都可以隨時睇到自己嘅戶口結餘&全部人嘅餘額,仲可以睇到每個人以往既交易紀錄(但你睇唔到個其他戶口持有人個名,留返少少私隱...)。
3. 每個人都可以喺神奇數簿內對自己戶口提出修改(交易),你只要通知一下你附近揸住數簿嗰個人,佢就會幫你更新再發佈俾其他數簿持有人。

咁好啦,睇返之前嘅情況,神奇數簿可以點解決?

A. 七達通俾人燒數簿,無晒D帳戶資料

因為神奇數簿有千千萬萬本,七達通隨時可以去揾其他有數簿嘅人,做個影印就OK。你可以燒一本數簿,但唔通你可以燒晒千千萬萬本數簿嗎?

B. 七達通無端端cut左大雄個戶口

喺神奇數簿嘅系統入面,所有資料(包括帳戶)係“分散式儲存”喺千千萬萬本數簿內,無任何一人有絕對權力!所以除左得你許可之外,無人可以刪除你個戶口或交易紀錄。

C. 胖虎+小福收買七達通,偷走晒大雄D錢

神奇數簿神奇嘅地方就係,佢地就算可以收買到一個數簿持有人,喺一本數簿度做手腳,但係只要有超過51%嘅數簿證明嗰個改動有問題,嗰個改動就會被否決。

總結

說穿了,Blockchain就係人人數簿 (Distributed Ledger), 能夠係無大台既情況下,人人睇到數簿既內容,亦可以自己提出內容修改,但係又能夠建立信任,確保到無人可以出千。

數簿入面既資料永遠係同步,可靠,正確。

所以,諗深一層,如果人人數簿實現到,我地根本唔需要類似七達通嘅中間人去做監管/信託,因為Blockchain嘅系統比“人”更值得信任。

************************

聽到呢度,你一定心諗,唓,咁個個都金手指啦,大家都可以喺自己個本數簿改到自己變李嘉誠,然後等同步就 fat fat 啦 !

年輕人,你太年輕啦....

 

呢個,下一篇再講!

 

原文刊於作者 medium 及 My Eth Shop  Facebook page

發表意見