立場新聞 Stand News

IT界鬧人才荒?你老闆有無問過自己點解?

2015/5/17 — 13:13

The Office 截圖

The Office 截圖

[email protected]前線科技人員】

【按:早前媒體報導,IT 界鬧人才荒,管理層大嘆本港 IT 人才青黃不接,應徵者質素差,請人困難,故要求從外地引入專才,以確保香港的競爭力。】

你話請唔到人既時候,你出幾錢請人呢?如果你 offer 到人人有層樓兼包私家醫院生仔,雖然係誇張啲,但我唔信你請唔到人。請唔到人嘅時候第一樣野唔係怨天由人,而係應該拎塊鏡出黎照下自己,照下自己間公司點樣,先有資格講請唔到人。

廣告

我唔明點解成篇文只係講到政府有問題求職者有問題,僱主先係受害者,生活成本隻字不提,我以家唔係要發大達,只係想生活安穩,應該唔係咁難理解掛?

你話香港生活成本高你控制唔到,但自己所控制的範圍呢?工作本身又幾有意義呢?試諗下你請個 programmer 返黎就只係因為你公司接左個無謂但有啲錢嘅 project,而個 programmer 就只係做其中一個唔知乜野 component,根本個 system 出街都唔知邊忽自己寫出黎,你話點會有人想做呢?

廣告

今年都 2015 年,如果你公司仲叫人寫 EJB,甚至更古老技術,你又諗下有幾多人會想做呢?員工學習空間同機會又有冇照顧到?我就見過唔少公司認為上三日五日堂太多,又驚住 train up 左佢地就走,事實係,你唔提供學習機會佢地走得更快,而留低喺你公司嘅,唔係點對學習有興趣的員工。

而家咁興創業,稍為有本事嘅,其實三五個人就搞到間公司出黎,接 project 又得,做 product 又得,幫其他 startup 做 product 都仲得,自己管理自己工作,點解要有個「老闆」黎管自己?甚至好似我公司咁,冇 manager,各人自己管自己。更加唔好講行內唔少連 Hello World 都寫唔出就想管班 programmer 的老闆,人地新加坡總理日理萬機都寫到個 Sudoku solver 出黎,你地知唔知醜?

管理層其實係封建時代產物,再到工業革命之後再加深,但當時候工人大多冇讀過書,先要揾啲讀過書嘅經理去管佢地。作為僱主,係咪應該好好反省下你除左一份勉強能生活的錢之外,你仲 offer 到乜野呢?

明眼人應該都知我提到既觀點只係來自 Dan Pink 講 "The surprising science of motivation",唔少人應該睇過,但到自己就做唔到,甚至仲停留在封建時代既管理思維,真係冇資格話請唔到人。

發表意見